728-pixel-x-90-2-learn
728-pixel-x-90
<< >>

ശശികപൂര്‍ അന്തരിച്ചു

ന്യൂഡൽഹി: ബോളിവുഡിന്റെ പഴയകാല പ്രണയനായകൻ ശശി കപൂർ (79) അന്തരിച്ചു.2011ൽ പത്‌മഭൂഷൺ നൽകി രാജ്യം ആദരിച്ചു. 2014ൽ ദാദാ സാഹിബ് ഫാൽക്കെ അവാർഡ് ലഭിച്ചു.ബാലനടനായി സിനിമയിലെത്തിയ ശശി കപൂർ നായകനായും നിർമ്മാതാവായും സംവിധായകനായും മികച്ച സംഭാവനകള്‍ ഇന്ത്യന്‍ ചലച്ചിത്രലോകത്തിനു സമ്മാനിച്ചു. 160ഓളം ചിത്രങ്ങളിൽ അഭിനയിച്ച ശശി കപൂർ ന്യൂഡൽഹി ടൈംസ് എന്ന ചിത്രത്തിലൂടെ മികച്ച മികച്ച നടനുള്ള ദേശീയ പുരസ്‌കാരത്തിന് അർഹനായിരുന്നു. മുഹാഫിസ് എന്ന ചിത്രത്തിലെ അഭിനയത്തിന് പ്രത്യേക പരാമർശവും ലഭിച്ചു. ദീവാർ, സത്യം ശിവം സുന്ദരം, തൃശൂൽ, കഭി കഭി തുടങ്ങിയ ഹിന്ദി ഹിറ്റു സിനിമകളിലൂടെ നായക സങ്കൽപത്തിന് പുതിയ നിർവചനം നൽകിയ നടനാണ് ശശി കപൂർ. രാജ്‌കപൂർ, ഷമ്മി കപൂർ എന്നിവരുടെ ഇളയ സഹോദരനായ ശശി കപൂർ നാലാം വയസിൽ തന്നെ താരമായി അരങ്ങേറ്റം കുറിച്ചു. പിതാവ് പൃഥ്വീരാജ് കപൂറിന്റെ പൃഥ്വീ തിയറ്ററിന്റെ നാടകങ്ങളിലായിരുന്നു തുടക്കം. പിന്നീട് വെള്ളിത്തിരയിൽ സഗ്രം,ധനാപാനി, ആഗ്, ആവാരാ തുടങ്ങിയവയിൽ ബാലനടനായി തിളങ്ങി. ഹിറ്റായ ചില സിനിമകളിൽ മൂത്ത സഹോദരൻ രാജ് കപൂറിന്റെ കുട്ടിക്കാലം അവതരിപ്പിച്ചു. 1961ൽ ഇറങ്ങിയ ധർമ്മപുത്രയിലൂടെ നായക വേഷം. 60കളിൽ താരമായി ഉദിച്ച് മൂന്നു ദശാബ്‌ദക്കാലം ബോളിവുഡിന്റെ പ്രണയ നായകനായി വിലസി.
ഹെര്‍മ്മന്‍ ഹെസ്സെയുടെ വിഖ്യാത നോവലായ സിദ്ധാർത്ഥ തുടങ്ങി ഒരു ഡസനോളം ഇംഗ്ലീഷ് ചിത്രങ്ങളിലും ശശി കപൂര്‍ മികവു തെളിയിച്ചു.അമിതാബ് ബച്ചനും റിഷി കപൂറും മുഖ്യ വേഷങ്ങളിൽ അഭിനയിച്ച അജൂബയുടെ നിർമ്മാതാവും സംവിധായകനുമായിരുന്നു. ജുനൂൻ, കലിയുഗ്, 36 ചൗരിംഗി ലേയ്‌ൻ, വിജേത, ഉൽസവ് തുടങ്ങിയ ചിത്രങ്ങളും നിർമ്മിച്ചു. ജുനൂൻ 1979ലെ മികച്ച ചിത്രമായി തിരഞ്ഞെടുക്കപ്പെട്ടിരുന്നു.


ജെന്നിഫർ കെന്റൽ ആണ് ഭാര്യ. കരൺ കപൂർ,​ സഞ്ജന കപൂർ,​ കുനാൽ കപൂർ എന്നിവർ മക്കളാണ്.വാര്‍ദ്ധക്യ സഹജമായ അസുഖങ്ങളെതുടര്‍ന്ന് മുംബൈയിലായിരുന്നു അന്ത്യം.

INDIANEWS24 MOVIES DESK

 

Leave a Reply