728-pixel-x-90-2-learn
728-pixel-x-90
<< >>

എലിപ്പനി പടരുന്ന സാഹചര്യത്തിൽ കര്‍ശന പ്രതിരോധ നടപടികളുമായി ആരോഗ്യ വകുപ്പ്

തിരുവനന്തപുരം:കേരളത്തിലെ വിവിധ പ്രളയബാധിത പ്രദേശങ്ങളില്‍ എലിപ്പനി പടരുന്ന സാഹചര്യത്തിൽ കൂടുതല്‍ മുൻകരുതലിന്‌ ആരോഗ്യവകുപ്പ്‌ നിർദേശങ്ങൾ നൽകിക്കഴിഞ്ഞു. ആരോഗ്യ പ്രവര്‍ത്തകരും പൊതുജനങ്ങളും ശ്രദ്ധിക്കേണ്ട കാര്യങ്ങളും ആരോഗ്യവകുപ്പ്‌ പുറത്തിറക്കി.പ്രളയം കഴിഞ്ഞ ഉടന്‍ തന്നെ ആരോഗ്യ വകുപ്പ് ഇക്കാര്യത്തില്‍ പ്രതിരോധ നടപടികള്‍ സ്വീകരിച്ചത്കൊണ്ടാണ് എലിപ്പനി ബാധിതരുടെ എണ്ണം നിയന്ത്രിതമായി തുടരുന്നത്.പല കാരണങ്ങളാല്‍ മുന്നറിയിപ്പ് അവഗണിച്ച പ്രളയബാധിതര്‍ക്കും രക്ഷാപ്രവര്‍ത്തകര്‍ക്കുമാണ് ഇപ്പോള്‍ പനി ബാധയുണ്ടായിരിക്കുന്നത്.

പ്രളയ ബാധിത പ്രദേശങ്ങളിലുള്ളവര്‍ എത്രയും വേഗം എലിപ്പനിയുടെ പ്രതിരോധ ഗുളികയായ ഡോക്‌സി സൈക്ലിന്‍ കഴിക്കണമെന്നും ആരോഗ്യവകുപ്പ്‌ നിർദേശിക്കുന്നു.എലിപ്പനി ബാധക്ക്‌ സാധ്യതയുള്ളതിനാൽ വീട് വൃത്തിയാക്കുന്നവരും വെള്ളത്തില്‍ ഇറങ്ങുന്നവരുമെല്ലാം മുന്‍കരുതലുകളെടുക്കണം. ഇതിനായി ആരോഗ്യ പ്രവര്‍ത്തകര്‍ നല്‍കുന്ന മാര്‍ഗനിര്‍ദേശങ്ങള്‍ കൃത്യമായി പാലിക്കണം.ആരംഭത്തില്‍ ചികിത്സ ലഭിക്കാത്ത അവസ്ഥയില്‍ രോഗം മൂര്‍ച്ഛിച്ച് കരള്‍, വൃക്ക, തലച്ചോര്‍, ശ്വാസകോശം തുടങ്ങിയ ആന്തരാവയവങ്ങളെ ബാധിക്കുകയും രോഗിയുടെ ജീവന്‍ തന്നെ അപകടത്തിലാവുകയും ചെയ്യുമെന്നു ആരോഗ്യ  വകുപ്പ് കര്‍ശനമായ മുന്നറിയിപ്പ് നല്‍കുന്നു.എലിപ്പനി ബാധിച്ചവര്‍ സ്വയം ചികിത്സയ്ക്ക് മുതിരാതെ ഉടനടി തന്നെ വൈദ്യ സഹായം തേടേണ്ടതാണ്.പ്രഥമ ഘട്ടത്തില്‍ തന്നെ ചികിത്സ ലഭിച്ചാല്‍ അസുഖം പൂര്‍ണ്ണമായും സുഖപ്പെടുത്തവുന്നതാണ്.

ലെപ്‌ടോസ്‌പൈറ ജനുസില്‍പ്പെട്ട ഒരിനം സ്‌പൈറോകീറ്റ മനുഷ്യരില്‍ ഉണ്ടാക്കുന്ന ഒരു ജന്തുജന്യരോഗമാണ് എലിപ്പനി. പ്രളയബാധിത മേഖലകളിലെ പകര്‍ച്ചവ്യാധികളില്‍ ഏറ്റവും പ്രധാനമാണിത്. ജീവികളുടെ മലമൂത്ര വിസര്‍ജ്യം ജലത്തില്‍ കലര്‍ന്നാണ് എലിപ്പനി പടരുന്നത്.രോഗാണുവാഹകരയായ എലി, അണ്ണാന്‍, പശു, ആട്, നായ എന്നിവയുടെ മൂത്രം, വിസര്‍ജ്ജ്യം മുതലായവ കലര്‍ന്ന വെള്ളവുമായി സമ്പര്‍ക്കം വരുന്നവര്‍ക്കാണ് ഈ രോഗം പകരുന്നത്. തൊലിയിലുള്ള മുറിവുകളില്‍ കൂടിയോ കണ്ണ്, മൂക്ക്, വായ വഴിയോ രോഗാണു മനുഷ്യ ശരീരത്തില്‍ പ്രവേശിക്കുന്നു. രോഗാണു ശരീരത്തില്‍ പ്രവേശിച്ച് കഴിഞ്ഞാല്‍ 4 മുതല്‍ 20 ദിവസത്തിനുള്ളില്‍ രോഗലക്ഷണങ്ങള്‍ പ്രകടമാകുന്നു. പനി, പേശി വേദന (കാല്‍ വണ്ണയിലെ പേശികളില്‍) തലവേദന, വയറ് വേദന, ഛര്‍ദ്ദി, കണ്ണ് ചുവപ്പ് എന്നിവയാണ് എലിപ്പനിയുടെ രോഗത്തിന്റെ പ്രാരംഭ ലക്ഷണങ്ങള്‍. ഈ ലക്ഷണങ്ങള്‍ കാണുമ്പോള്‍ തന്നെ ശരിയായ ചികിത്സ നല്‍കുകയാണെങ്കില്‍ പരിപൂര്‍ണ്ണമായും ഭേദമാക്കാവുന്നതാണ്.

INDIANEWS24 HEALTH DESK

Leave a Reply