728-pixel-x-90-2-learn
728-pixel-x-90
<< >>

‘ആം ആദ്മി’ കേരളത്തില്‍ വന്നാല്‍ ഒരു ചുക്കും സംഭവിക്കില്ല:

ആം ആദ്മി പാര്‍ട്ടി കേരളത്തില്‍ വന്നാല്‍ എന്ത് സംഭവിക്കും??

ഒരു ചുക്കും സംഭവിക്കില്ല എന്നതാണ് സത്യം.ആം ആദ്മി പാര്‍ട്ടിക്ക് എന്തെങ്കിലും സംഭവിക്കാതിരുന്നാള്‍ നല്ലത്.വരാതിരുന്നാല്‍ അത്രയും നല്ലത്.സംശയം ഉണ്ടെങ്കില്‍ ദില്ലിയുടെ മുഖഛായ മാറ്റിയ, അഴിമതിയുടെ കറ പുരളാത്ത ഇ.ശ്രീധരനോട്‌ ചോദിച്ചു നോക്ക്.

നഗരം എന്ന നിലയില്‍ കേരളം ദില്ലിയോളം വരില്ല .കേരളത്തെ ഒരു സംസ്ഥാനം എന്ന് വിളിക്കുന്നതിലും നല്ലത് രാജ്യത്തെ ഏറ്റവും കുടുതല്‍ വിസ്തൃതി ഉള്ള നഗരം എന്ന് വിശേഷിപ്പിക്കുന്നതാണ്.നഗരങ്ങളെ കുറിച്ച്  പി. ഭാസ്കരന്‍ എഴുതിയ വരികള്‍ ആണ് കേരളത്തിനു ഏറ്റവും ചേരുന്നത്.

നഗരം നഗരം മഹാസാഗരം

കളിയും ചിരിയും മേലെ

ചളിയും ചുഴിയും താഴെ…..അതെ ചുഴികള്‍ !!രക്ഷപെടാന്‍ ഒരു കച്ചിത്തുരുമ്പു പോലും കിട്ടാത്ത ആഴ കയത്തിലേക്ക് വലിച്ചു കൊണ്ട് പോകുന്ന വലിയ ചുഴികള്‍ .അതാണ്‌ ആം ആദ്മി കേരളത്തില്‍ വന്നാല്‍ അവരെ കാത്തിരിക്കുന്നത്.

ഓര്‍ക്കുന്നുണ്ടോ പണ്ട് പണ്ട് സ്വാമി വിവേകാന്ദന്‍ വന്നിട്ട് ഇവിടെ നടക്കുന്ന കളികള്‍ കണ്ട് മനം മടുത്ത് പോയത്.ഭാരതത്തിന്റെ രാഷ്ട്ര ചേതനയെ തോട്ടുണര്‍ത്തിയ സ്വാമികള്‍ , ഒന്നും ചെയ്യാനോ പ്രവര്‍ത്തിക്കാനോ അദ്ദേഹം ആഹ്വാനം ചെയിതില്ല .ചിന്താ ശേഷിയും ധൈഷണികതയും ഏറെയുള്ള ,അദ്ദേഹത്തിന്‍റെ തലയിലെ ഫ്യുസടിച്ചു പോയി എന്നതാണ് സത്യം.കേരളത്തിലെ മതപരവും സമൂഹികവും രാഷ്ട്രീയപരവുമായ അവസ്ഥ കണ്ടിട്ട് അദ്ദേഹം പറഞ്ഞു ‘കേരളം ഒരു ഭ്രാന്താലയമാണ്‌’. ഒരു ക്ലാസ് മുറിയില്‍ സന്മാര്‍ഗ്ഗം പഠിപ്പിക്കാന്‍ ചെന്ന അധ്യാപകന്‍ ‘നിനക്കൊക്കെ മുഴു വട്ടാടാ പിള്ളേരെ’ എന്ന് പറഞ്ഞു ഇറങ്ങി പോയിട്ട് സ്റ്റാഫ് റൂമില്‍ പോയിരന്നു ധ്യാനിച്ചാല്‍ അദ്ദേഹത്തിന്‍റെ തലയുടെ ഫ്യൂ സ് അടിച്ചു പോയി എന്ന് ഭംഗ്യന്തരേണ പറയുന്നതില്‍ തെറ്റുണ്ട് എന്ന് തോന്നുന്നില്ല.ചിക്കാഗോയില്‍ വച്ച് അമേരിക്കക്കാരുടെ അവഗണനയ്ക്ക് മുന്നില്‍ പോലും ,ഭംഗിയായി സംസാരിച്ച സ്വാമി വിവേകാനന്ദന്‍ ആണ് ഇന്ത്യയിലെ ഒരു സംസ്ഥാനം വെറും ഭ്രാന്താലയം ആണ് എന്ന് പറഞ്ഞത്.

ഏതാണ്ട് ഒരു നൂറ്റാണ്ട് മുന്‍പാണ് ഇതൊക്കെ നടന്നത്.1892-2013 കാലഘട്ടത്തിനിടക്ക് കേരള സമൂഹത്തില്‍ ഒരുപാടു പേര്‍ ഭ്രാന്തില്ലാത്തവരായി ജനിക്കുകയും ജീവിക്കുകയും ചെയ്യുന്നുണ്ട്.എങ്കിലും കൂടുതലും ഭ്രാന്തന്‍മാരാണ്.ജാതി-മതം എന്നീ രണ്ടു കാര്യങ്ങളെ മുന്‍ നിര്‍ത്തിയാണ് സ്വാമി വിവേകാനന്ദന്‍ കേരളത്തെ ഭ്രാന്താലയം എന്ന് വിളിച്ചത്.കേരളത്തിലെ മത-ഭ്രാന്തന്‍മാര്‍ക്ക് നേതൃത്വം നല്‍കുന്നവര്‍ മറ്റ് എല്ലായിടത്തെയും പോലെ തന്നെ സമചിത്തത ഉള്ളവരും കച്ചവട മനസ്സ് ഉള്ളവുരും ആണ് .പക്ഷെ ഇവിടുത്തെ ജാതി-മത വിഭാഗങ്ങള്‍ ഒന്നൊഴിയാതെ എല്ലാവരും സുസംഘടിതരാണ്.ളാഹാ ഗോപാലന്‍,സി കെ ജാനു ,വെള്ളാപ്പള്ളി,സുകുമാരന്‍ നായര്‍ ,കാന്തപുരം ,തങ്ങള്‍ ,പിന്നെ പാലായിലെ പ്രധാനമന്ത്രിക്ക് പിന്നിലും ചിലപ്പോള്‍ മുന്നിലും അണിനിരക്കുന്ന വിവിധ തരം ബിഷപ്പുമാര്‍ ,ശമ്പളം കൂടുതല്‍ ചോദിച്ചാല്‍  ഗുണ്ടകളെ വിട്ടു നേഴ്സ്മാരെ തല്ലിക്കുന്ന ‘ആള്‍ദൈവം’. അങ്ങനെ എല്ലാവരുടെയും പിന്നില്‍ ഉള്ളവര്‍  സുസംഘടിതര്‍ ആണ്.

ഇതിനെ എല്ലാം ചേര്‍ത്ത് , സംഘടിത ഭ്രാന്തന്‍മാര്‍ എന്ന് വിളിച്ചാല്‍ അത് പൂര്‍ണ്ണമായും തെറ്റാണ്.കാരണം കേരളത്തിലെ ന്യുനപക്ഷ-ഭൂരിപക്ഷ മത നേതാക്കള്‍ക്ക് പിന്നില്‍ എന്തിനും തയ്യാറായി നില്‍ക്കുന്ന ഭ്രാന്തന്‍മാര്‍ യഥാര്‍ത്ഥ ഭ്രാന്ത്‌ ഉള്ളവര്‍ അല്ല.ഭ്രാന്ത്‌ അഭിനയിക്കുന്നവര്‍ ആണ്.അവിടെയാണ് ആം ആദ്മി സൂക്ഷിക്കേണ്ടത്.ആം ആദ്മി കേരളത്തില്‍ അധികാരത്തില്‍ വരും എന്ന് തോന്നിയാല്‍ ഈ ഭ്രാന്തുള്ളവര്‍ ആയി ഭിനയിക്കുന്ന എല്ലാവരും അതിനു പിന്നില്‍ ചൂലും പിടിച്ചു ,കദര്‍ തൊപ്പിയും ധരിച്ച് അണിനിരക്കും.നികൃഷ്ട ജീവി എന്നോ തീവ്രവാദി എന്നോ എന്ത് വേണമെങ്കിലും കേജിര്‍വാള്‍ വിളിച്ചോ.ക്ഷമിക്കും,സഹിക്കും.പക്ഷെ പാലയില്‍ നിന്നും മാണിയും ,മലപ്പുറത്ത് നിന്നും കുഞ്ഞാലിക്കുട്ടിയും മാത്രമേ ജയിക്കൂ.വെള്ളാപ്പള്ളിയും സുകുമാരന്‍ നായരും ഒക്കെ ആ കാര്യത്തില്‍ അന്തസ്സ് ഉള്ളവര്‍ ആണ്.ജയിക്കുന്നവരുടെ കൂട്ടത്തില്‍ ഉള്ള നായരെയും ഈഴവരെയും ഒക്കെ വച്ച് അവര് അഡ്ജസ്റ്റ് ചെയ്യും.അവര് പറയുന്ന ആരെയെങ്കിലും മന്ത്രി ആക്കിയാല്‍ മതി.പിന്നെ ആം അദ്മിയെ വിറ്റ് കാശ് മേടിച്ചു പോക്കറ്റില്‍ ഇടും.എതിര്‍ക്കാന്‍ ചെന്നാല്‍ പറയും ന്യൂനപക്ഷ വിരുദ്ധം!ഭൂരിപക്ഷ വിരുദ്ധം!!!

കേജിര്‍വാള്‍ അല്ല ദേവേന്ദ്രന്റെ അച്ഛന്‍ മുത്തുപ്പട്ടരു വന്നാലും ശരി, ഇവിരെല്ലാം ചേര്‍ന്ന് ,അഴിമതി വിരുദ്ധ ചൂലിന്റെ കേട്ട് അഴിച്ചു വിടും.കാരണം വിദ്യാസമ്പന്നരായ കേരളത്തിലെ ജനങ്ങളില്‍ ഭൂരിപക്ഷവും അഴിമതിയെ സ്നേഹിക്കുന്നവര്‍ ആണ്.ജനകീയ അസൂത്രണം പോലെ  ജനകീയ അഴിമതി ലോകത്ത് എവിടെയും നടന്നിരിക്കാന്‍ ഇടയില്ല. മതത്തേയും ജാതിയേയും ഓക്കെ ഉപയോഗിക്കാന്‍ നന്നായി പഠിച്ചവരുമാണ് ഇക്കൂട്ടര്‍ .നിയമപരമായി പോലും ഒന്നിനെയും ചോദ്യം ചെയ്യാന്‍ കഴിയാത്ത വിധം കാക്കാനും, കട്ടതിലും നന്നായി നില്‍ക്കാനും അവര്‍ക്ക് അറിയാം.ജസ്റ്റീസ് ബാലകൃഷ്ണന്‍ ,ബാലകൃഷണ പിള്ള എന്നിവര്‍ തന്നെ നല്ല ഉദാഹരണം.ഇത് ഇ.ശ്രീധരനെ പോലെയുള്ളവരെ ആദരിക്കുന്ന ഡല്‍ഹി അല്ല അദ്ദേഹത്തെ ഓടിക്കാന്‍ നോക്കിയ കേരളം ആണ്.കൊല്ലാനും കൊലക്ക് കൊടുക്കാനും മടി ഇല്ലാത്തവര്‍ .പോള്‍ മുത്തൂറ്റ് ,സ്വാമി-ശ്വാശ്വതീകാനന്ദ ,സിസ്റ്റര്‍ അഭയ ,ചന്ദ്രശേഖരന്‍ തുടങ്ങിയവരേ കൊന്നു കൊലവിളിച്ചിട്ടു അതിനു പിന്നില്‍ പ്രവര്‍ത്തിച്ച ആര്‍ക്കും ഒന്നും സംഭവിച്ചിട്ടില്ല.ഇതൊക്കെ ദില്ലിയിലും നടക്കുന്നുണ്ടാക്കും പക്ഷെ ഇത്തരം പാതകങ്ങള്‍ക്കെതിരെ നിയമ നടപടി എടുത്താല്‍ ജനരോക്ഷം ആളി കത്തുന്ന സംസ്ഥാനം കേരളം പോലെ വേറെ കാണില്ല.

ഐ എ എസ് ഉദ്യോഗം ഉപേക്ഷിച്ചു പൊതു പ്രവര്‍ത്തനത്തിനു വേണ്ടി ത്യാഗം ചെയ്യുന്നു എന്ന് പറഞ്ഞു ആം ആദ്മി തലവന്‍ കേജിര്‍വാള്‍ കേരളത്തിലേക്ക് വരുന്നത് മൂന്നു വട്ടം ആലോചിച്ചു വേണം.കാരണം ,ജന്മിത്തം കൊടി കുത്തി വാഴുന്ന കാലത്ത് , നോക്കെത്താ ദൂരത്ത് ഭൂസ്വത്തുക്കള്‍ ഉണ്ടായിരുന്ന ഏലം കുളത്തെ സ്വത്തുക്കള്‍ മുഴുവന്‍ ഒരു പൊതു പ്രസ്ഥാനത്തിന് തീറെഴുതി കൊടുത്ത ശേഷം തിരഞ്ഞെടുപ്പില്‍ മത്സരിച്ച മുഖ്യമന്ത്രി ആയ  ഇ.എം.എസ്സിന്റെ നാടാണ് കേരളം.ആ ഇ.എം.എസ്സിനെ ഇല്ലാക്കഥ പറഞ്ഞു വിമോചന സമരം ചെയിതു താഴെ ഇറക്കിയ നേതാവ് ആണ് ആന്റണി എന്ന ആദര്‍ശ ധീരന്‍.അന്ന് അന്റണിയുടെ പിന്നില്‍ അണിനിരന്ന മത ശക്തികള്‍ തന്നെ വിദ്യാഭ്യാസ കച്ചവട കാര്യത്തില്‍ കൂട്ട് നില്‍ക്കാഞ്ഞതിന്‍റെ പേരില്‍ അദ്ദേഹത്തെ കേരളത്തില്‍ നിന്നും ദില്ലിക്ക് ഓടിച്ചു.ദില്ലിയിലെ കോണ്‍ഗ്രസ്സിനോടു കളിക്കാന്‍ ചെന്ന പോലെ കേരളത്തില്‍ കളി ഇറക്കിയാല്‍ വിവരം അറിയും.അല്ലെങ്കില്‍ കസ്തൂരിരംഗനോടു ചോദിച്ചു നോക്ക്.

കസ്തൂരി രംഗന്‍ ചെയിത തെറ്റ് എന്താണ് എന്നറിയാമോ? നാട് അല്ല…. കാട് സംരക്ഷികണം എന്ന് പറഞ്ഞു റിപ്പോര്‍ട്ട് നല്‍കി.അപ്പോള്‍ കേജിര്‍വാള്‍ നാട് നന്നാക്കണം എന്ന് പറഞ്ഞു വന്നാലുള്ള അവസ്ഥ ആലോചിച്ചു നോക്ക്.ആദരണിയനായ ഇടുക്കി ബിഷപ്പിന്റെ ഭാഷയില്‍ പറഞ്ഞാല്‍ കേരളം കാഷ്മീര്‍ ആകും.ആം ആദ്മി പാര്ട്ടിക്കാര് ഒരു കാര്യം കൂടി ഓര്‍മ്മയില്‍ വക്കുന്നത് നല്ലതാണ്. കാശ്മീരില്‍ ഉള്ള തീവ്രവാദികള്‍ക്ക് വിദ്യാഭ്യാസം ഇല്ല ഇവിടെ വിദ്യാഭ്യാസം അടക്കം എല്ലാ അഭ്യാസവും കഴിഞ്ഞ മത ഭ്രാന്തന്‍മാരായി അഭിനയിക്കുന്ന തീവ്രവാദികള്‍ ഉള്ള നാടാണു.എല്ലാത്തിലുമുപരിയായി സര്‍വ്വ ശക്തയായ ആള്‍ ദൈവവും ഉണ്ട്.കേരളം ദൈവത്തിന്റെ സ്വന്തം നാടാണ്.God’s Own Country.

അത് കൊണ്ട് ഏതെങ്കിലും വിവരദോഷികള്‍ പറഞ്ഞത് കേട്ട് അരവിന്ദ് കേജിര്‍വാള്‍ എന്ന ധീരന്‍ കേരള ചതുരംഗത്തില്‍  യുദ്ധം ചെയ്യാന്‍ വാള് ഊരിയെങ്കില്‍ അത് ഉറയിലിടുന്നാതാണ് നല്ലത്.അല്ലെങ്കില്‍ ആദ്മി ഇല്ലാത്ത ആപ്പുകളുമായി (ആം )തിരികെ ദില്ലിക്ക് വണ്ടി കേറേണ്ടി വരും.ഇനി അങ്ങനെ പിന്‍ തിരിഞ്ഞു പോകാന്‍ പരിപാടി ഇല്ല എങ്കില്‍ പിന്നെ ഒന്നും നോക്കില്ല 51 വെട്ട് ,അതും മുഖത്ത് തന്നെ.ആരാണ് എന്നല്ലേ,നേരിട്ട് പറയാന്‍ പേടിയാണ് വേണമെങ്കില്‍ ഫെയിസ് ബുക്ക് എടുത്ത് വെച്ച് നോക്ക്.ആളുകളെ ഒക്കേ കാണാം.

 

 

 

Leave a Reply