728-pixel-x-90-2-learn
728-pixel-x-90
<< >>

ഇടുക്കിയില്‍ അച്ചന് എതിരെ ബച്ചന്‍

വരുന്ന ലോക്സഭാ തെരഞ്ഞെടുപ്പില്‍ ഇടുക്കി മണ്ഡലത്തില്‍ ഇടതുപക്ഷം ഏതെങ്കിലും ഒരു പള്ളീലച്ചനെ സ്ഥാനാര്‍ഥിയാക്കും. കസ്തൂരി രംഗന്‍ റിപ്പോര്‍ട്ടിന്റെ പേരില്‍ കത്തോലിക്കാ സഭയ്ക്കുള്ള കൊതിക്കെറുവ്‌  പൂര്‍ണമായും മുതലാക്കാനാണിത്. അച്ചന്‍ തരംഗത്തെ മറികടക്കാന്‍ യുഡിഎഫ് അമിതാഭ് ബച്ചനെ സ്ഥാനാര്‍ഥിയാക്കും. രണ്ട് കാര്യവും ഞങ്ങള്‍ കേരളത്തിലെ ചില ഓണ്‍ലൈന്‍ പോര്‍ട്ടലുകാര്‍ തീരുമാനിച്ചതാണ്. സ്ഥാനാര്‍ഥിയായി തീരുമാനിച്ച വിവരം അപ്പോള്‍ത്തന്നെ ബച്ചനെ ഫോണില്‍ വിളിച്ച് അറിയിക്കുകയും ചെയ്തു. ‘കുത്തേ കാ ബച്ചാ’ എന്ന് വിളിച്ചാണ് ബച്ചന്‍ സന്തോഷം പങ്കുവെച്ചത്.

സിപിഐ എമ്മിന്‍റെ ആദ്യഘട്ട സ്ഥാനാര്‍ഥിപ്പട്ടിക ഞങ്ങള്‍ കഴിഞ്ഞ ദിവസം തീരുമാനിക്കുകയും പ്രസിദ്ധീകരിക്കുകയും ചെയ്തത് അറിഞ്ഞിരിക്കുമല്ലോ? യുഡിഎഫിനേക്കാള്‍ വളരെ മുന്നേ സ്ഥാനാര്‍ഥികളെ തീരുമാനിക്കാന്‍ സഹായിച്ചതില്‍ പാലക്കാട് നടക്കുന്ന സിപിഐ എം പ്ലീനം ഞങ്ങളോട് നന്ദി പ്രകാശിപ്പിച്ചിട്ടുണ്ട്. ഇപ്പൊള്‍ നന്ദി മാത്രമേ കിട്ടിയിട്ടുള്ളൂ. പിണറായിയെ എങ്ങാന്‍ നേരില്‍ കണ്ടാല്‍ വേറെ ചിലതുകൂടി കിട്ടിയേക്കും.

സിപിഐ എമ്മിന്‍റെ ആദ്യഘട്ട സ്ഥാനാര്‍ഥിപ്പട്ടികയില്‍ കൂടുതലും സിനിമക്കാരെയാണ് ഞങ്ങള്‍ പരിഗണിച്ചത്. പുട്ടിന് പീര ഇടുന്നതുപോലെ ചില വാര്‍ത്താവായനക്കാരെയും പരിഗണിച്ചിട്ടുണ്ട്. ഏറണാകുളത്ത് റീമ കല്ലിങ്കലിനെയും ചാലക്കുടിയില്‍ റിപ്പോര്‍ട്ടര്‍ ടി വിയുടെ നികേഷിനെയും സിപിഐ എം സ്ഥാനാര്‍ഥികള്‍ ആക്കാനാണ് ഞങ്ങളുടെ തീരുമാനം. വീരേന്ദ്രകുമാറിനെ മൂന്നുവട്ടം തള്ളിപ്പറഞ്ഞാല്‍ മാതൃഭൂമിയിലെ വേണുവിനെ അടുത്ത ഘട്ടത്തില്‍ പരിഗണിക്കും. കൊല്ലത്ത് പീതാംബരക്കുറുപ്പിനെതിരെ രതിച്ചേച്ചി ഇറക്കി കാര്യങ്ങള്‍ കൊഴുപ്പിക്കാനാണ് ആലോചന. മനോരമയിലെ ഷാനിമോള്‍, നടി കാവ്യാ മാധവന്‍ എന്നിവരെ വേറാര്‍ക്കും വേണ്ടാത്ത സീറ്റുകളില്‍ നിര്‍ത്തും. പൊന്നാനിയില്‍ മമ്മൂട്ടിയെ മത്സരിപ്പിക്കുന്ന വിവരം നേരത്തെ പ്രഖ്യാപിചിരുന്നല്ലോ. മദനി ജയിലില്‍ കിടന്ന് പൊന്നാനിയില്‍ മത്സരിക്കാന്‍ തയ്യാറായാല്‍ മമ്മൂട്ടിയെ മലപ്പുറത്തിന് തട്ടും.

മറ്റ് മണ്ഡലങ്ങളിലെ സ്ഥാനാര്‍ഥികളെ ഇതുപോലെ ഉള്‍വിളി ഉണ്ടാകുമ്പോള്‍ ഞങ്ങള്‍ പ്രഖ്യാപിക്കുന്നതാണ്. എല്ലാവരും വോട്ടുചെയ്ത് വിജയിപ്പിക്കണം.

വാര്‍ത്ത‍ പുറത്തുവന്നതോടെ സ്ഥാനാര്‍ഥികള്‍ ആകാന്‍ ഒട്ടേറെപ്പേര്‍ ഞങ്ങളെ സമീപിച്ചിട്ടുണ്ട്. പരമാവധി ആള്‍ക്കാരെ സ്ഥാനാര്‍ഥികള്‍ ആക്കാന്‍ ശ്രമിക്കുന്നതാണ്. ഇതിനുവേണ്ടി തമിഴ്നാട്ടില്‍ നിന്ന് രണ്ടോ മൂന്നോ സീറ്റ് വായ്പ മേടിക്കുന്ന കാര്യവും പരിഗണനയിലുണ്ട്.

മോഹന്‍ലാലിനെ മത്സരിപ്പിക്കാന്‍ ഫാന്‍സ് അസോസിയേഷനില്‍നിന്ന് കടുത്ത സമ്മര്‍ദമാണ്. ലാലേട്ടന്‍റെ നടപ്പില്‍ ഒരു വലതുപക്ഷ വ്യതിയാനം ഉള്ളതാണ് എല്‍ഡിഎഫ് പട്ടികയില്‍ ഉള്‍പ്പെടുത്താനുള്ള തടസം. പകരം ലാലേട്ടന് ഒരു രാജ്യസഭാ സീറ്റ് തരപ്പെടുത്തിക്കൊടുക്കാന്‍ ഞങ്ങള്‍ ശ്രമം തുടരുകയാണ്.

യുഡിഎഫിന്‍റെയും ബിജെപിയുടെയും പട്ടിക തയ്യാറാക്കാനുള്ള അച്ചില്‍ മഷി പുരട്ടിക്കഴിഞ്ഞു. നരേന്ദ്രമോഡിക്ക് തിരുവനന്തപുരം സീറ്റ് നല്‍കാമെന്നായിരുന്നു കരുതിയത്‌. പക്ഷേ, പ്രധാനമന്ത്രി ആകണമെങ്കില്‍ ആദ്യം ഇലക്‌ഷന്‍ ജയിക്കണമെന്ന് പറഞ്ഞ് അങ്ങേര്‍ വന്നില്ല. ഗുജറാത്തില്‍ കിടന്ന് നരകിക്കാനാണ് മോഡിയുടെ വിധി.

പക്ഷേ പറഞ്ഞുകേട്ടതുപോലെ അല്ല മോഡി കേട്ടോ. നല്ല തങ്കപ്പെട്ട മനുഷ്യനാ. ഇവിടത്തെ സ്ഥാനാര്‍ഥിനിര്‍ണയത്തിന്റെ തിരക്കൊക്കെ കഴിയുമ്പോള്‍ ഗുജറാത്തിലേക്ക് ചെല്ലാന്‍ ഞങ്ങളെ ക്ഷണിച്ചിട്ടുണ്ട്. മാധ്യമരംഗത്ത്‌ ഞങ്ങള്‍ നല്‍കിക്കൊണ്ടിരിക്കുന്ന സംഭാവനയുടെ പേരില്‍ വല്ല പുരസ്കാരവും നല്‍കാനായിരിക്കും. ഗോധര റയില്‍വേസ്റ്റേഷനില്‍ കാണാമെന്നാണ് പറഞ്ഞിരിക്കുന്നത്. മോഡി അല്ലേ ആള്. ഗംഭീരസ്വീകരണമായിരിക്കും എന്ന കാര്യം ഉറപ്പ്.

[മലയാളത്തിലെ ചില ഓണ്‍ലൈന്‍ പോര്‍ട്ടലുകളില്‍ അടുത്തുതന്നെ വരാന്‍ ഇടയുള്ള ഒരു വാര്‍ത്ത‍]

Leave a Reply